Ich Hertweig von dem wasen, vergich offenwar vnd chunt allen den, di disen brief sechent oder horent lesen, daz ich dev drev lechhen datz pavngarten han avf gegeben willichleichen vnd ledichleichen vnser vrowen vnd ir Goteshaus datz Seitensteten. vnd dem erwern herren apt Otten des selben Goteshauss, durch meiner sel willen, vnd durch aller miner vrevnt sel willen, dev ich chofft von Heinreichen dem taler vmb sechs vnd zwaintzig phvnt phenninge, dev mir noch seinem tode sein chind ze chrieg teten, Heinreich vnd Sophey, Gedraut vnd alheit, vnd iahen. sev hieten recht an den selben lechen, die ich mit vrevnt rat vnd nach vrevnt rat. vnd mit ierem gutem willen, vnd mit aller irr vrevnt willen, von dem chrieg chert han, mit ainem vnd dreistg phvnt phenninge. die ich in gegewen han, dor vmb auch, daz si gutlichen vnd willichleich von dem vor genantem gut stvnden, vnd iz auch auf gewen ledichleichen vnser vrowen vnd ir goteshavs vnd dem vorgenanten herren apt Otten von Seitensteten. Swer sev dor vber haben wolt, der sol vnser vrowen vnd ir Goteshaus geben dreistg phvnt phenninge vnd hundert phvnt phenninge. daz daz stet vnd vnverchert beleib. vnd noch meinem tode on chrieg, gib ich vnser vrowen vnd meim herren apt Otten von Seitensteten disen brief ze einem vrchunde. bestetiget vnd gevestet mit meinem Insigel vnd mit meines bruder insigel hern Otten von dem vasen, vnd sint des gezevge, her heinreich von winden. her heinreich der Streler. Heinreich der taler. Herman der Nevnberger. Seifrit der hesyb. Ruger von zaucha, Alram von reikerstorf. Dietreich der Schirmer. Dietreich von Reikerstorf. Dietreich von Glevzz. alram der Stiller. Dietreich von erbing. vnd ander piderwer levt genuge, den iz chunt vnd gewizzen ist. Daz ist geschehen, da von Christes geburt warn tausent iar, vnd drev hundert iar. dar nach im aindleften iar. an sant Jacoben tag.

Source Fulltext: RAAB, Seitenstetten (=FRA II/33, Wien 1870) S. 146-147