Wir Thoman von Gottes genaden abbt ze Lambach bekennen mit dem brieve, das fur uns komen ist Barbara, vormallen Thomann von Moos seligen hausfraw, und hat mit wolbedachtem mut und gutem willen recht und redleichen gemachtt und geben irem yeczundigen man Wolfganng dem Sneider vierczechen phundt pfenning morigengabweys nach dem lanndes rechten im lanndt ob der Enns auf irr gerechtikait an Mos und an Weygkcharting. Also haben wir im, dem yetz bemeltten Wolfganng Sneider, das berurt sein gemachtt rechtter morigengabweys nach dem lanndtsrechten ob der Enns auf der obgenanten seiner hausfrawn Barbara gerechtikait an Mos und Weigkcharting bestett und verlichen, was wir im rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol nach lautt der brief, so uber Mos und Weigkcharting seinn. Es ist auch die obgenant Barbara und all ir erben des obenanten gemachtz auf irr gerechtikait an Mos und Weigkcharting des berurten irs mann Wolfganng Sneider rechtt gwern und furstandt fur all rechtleichew ansprach, wo und wann im des not und durft beschiecht mit dem rechten, als dann soleichs gemachtz, morgengabweis und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser hanndt und gutem willen, und sulln uns auch alles das davon leyden und dulden, das annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigelten mit unnserm anhanngundem insigel. Geben als man zalt nach Kristi geburde in dem vierczechenhundertundvierundfunffczigisten jaren an mitichen Johannis et Pauli apostolorum.