Wir Thoman von Gottes genaden abbt ze Lambach bekennen mit dem brief, das fur uns komen sind Bernhart Pinter, sein hausfraw Wanndel und habent mit wolbedachtem mut und gutem willen und wissen irr gesweyn und gesweynin, brueder und swestern Petern des Pern und Elsbethen, Lienharten des Maurer in der Schusstat hausfraw, auch Annan, Symonn des Gutmenndleins hausfraw, geswistreden, recht und redleichen verkaufft das haws, hofstat, hofmarich, pewnten, darinn das haws lewt, genant in der Schusstat ob des Lienhart Maurer, und habent dy ze kawffen gegeben irm gesweyn und brueder Hennslein dem Pern, seiner hausfrawn Anna und irn baiden erben umb ain sum gelcz, der sew gantz und gar ausgericht und beczalt worden sind zu rechtten tagen an allen schaden. Also haben wir in den yetz benanten dem Hennsel Pern, seiner hausfrawn und irn baiden erben das obgenant haws, hofstat, hofmarich, pewnten mit aller zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unnserm gotshaus all jar jarleichen davon raichen und dienn sol nach innhaltung unnsers gotshauss urbarpuch. Es sinnd auch dy obenanten Wernhart Pinter, sein hausfraw und irer baider erben des oberurten hauss, hofstat, hofmarich, pewnten mit aller zugehorung des gemeltten Hennsel Pern, seiner hausfrawn und irer baider eriben rechtt gwern und furstandt fur all rechtleich ansprach, wo und wann in des not und durft beschiecht mit dem rechten, als dann soleichs kaufs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser hanndt und gutem willen, und sullen uns auch alles das davon leyden und dulden, das annder unnsers gotshauss lewt gesessen hie in unnserm purkchfrid gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngunndem insigel. Geben als man zalt nach Kristi geburde vierczechenhunndertunddreynundfunnfczigisten jaren an mantag vor Allexii.