Erwirdiger, geistleicher herr her Thoman abbt zu Lambach, ich Michel Lewttner tun ewern genaden zu wissen, das ich meinem lieben swager Lienharten Hewgleinslewtter, seiner hausfrawn Ursula und irn baiden erbn ze kauffen gegeben hab allen meinen erbtail, der mir rechtleich zugepurdt an dem gut gelegen zu Hewgleinslewtten, das eribrecht von ew und ewerm gotshawss dienstper ist, umb ain sum gelts, der ich gantz entricht und beczalt worden bin zu rechtten tagen an allen schaden. Darumb bitt ich obgenanter Michel ewr gnad, daz ir meinem obgenanten swager, seiner hawsfrawn und irn baiden eriben denselben mein erbtail an dem benanten gut bestett und verleicht, und darumb brief und sigel gebt, darumb sol und wil ich, all mein erben noch ander nyemants nicht von unsern wegen ewern gnaden furbas in ewr sigel und bestetten nicht reden noch sprechen in kainen wegen angever. Ze urkund gib ich des also den offenn brief, besigeltem mit der erbern weisen Mertten Praitwiser und Hannsen des Hobschen, baider burger zu Wels aufgedrukchtten insigeln, die ich mit vleiss darumb gebeten hab, in baiden und allen irn eriben an schaden, darunder ich mich obgenanter Michel Lewttner fur mich und all mein erben verpind mit meinen trewn in aidesweys das alles war und stet zu halden, das an dem brief geschriben stet. Geben als man zalt nach Kristi gepurd in dem vierczechenhundert und zwainundvierczigisten jaren an sambstag an sannd Kathrein abent der heiligen junkchfrawn.