Wir Thoman von Gottes genaden abbt zu Lambach bekennen mit dem brief, das wir recht und redleichen ze kauffen gegeben haben Micheln dem Fleischakcher, seiner hausfrawn Margrethen und irn baiden eriben unsern garten mit seiner zugehorung, als er yetz mit dem zawn umbfanngen ist, gelegen hie in unserm purkchfrid auf der lewtten zwischen der Rendelmageninn und der Geschelinn hewser, da durch ain steig get aus dem markcht ab zu der Swaig, den wir von dem edeln Veiten dem Mulbannger kawfleich vormalln in unser gwaltsam bracht haben. Also haben wir im, dem benanten Micheln, seiner gemeltten hausfrawn und irn baiden eriben den gemeltten garten zu rechttem kauf und purkchrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaus all jar jarleichen da von raichen und dienn sol ze purkchrecht des nagsten suntag nach dem prehentag sechczigk Wienner phenning. Wir welln auch, das sy kainerlay wanndlung damit nicht haben sulln in kainerlaye weis an unser hanndt und gutem willn und sulln uns auch alles das davon leiden und dulden das annder unsers gotshauss lewt gesessen hie in unserm purkchfrid gein uns leident und duldent unverczigen unsers gotshauss rechten in allen sachen. Ze urkund geben wir in des also den offenn brref, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundzwainundvierczigisten jaren an eritag nach Jacobi apostoli.