Dem erwirdigen und geistleichen herren herrn Thoman abbt zw Lambach embeut ich Mertt Hawnnolt mein willig gehorsam diennst bevor. Von wegen des Newfang zw nidern Lochen, gelegen in Welser pharr, so ich zw eriblehen von euren genaden und eurm gotzhaws hab, hab ich verchauft meiner lieben muemen Elsbetten der Zynespanin zw Wels, als ir in ainem chaufbrief von mir ausgangen ir daruber gegeben wol vernemen werdet, da senndt ich euch denselben Newfang mit seiner rechtleichen zuegehorung, als er mit zawn umbfangen ist, widerumb auf in chraft des briefs, und bitt eur genad in sunderm und ganntzen vleis, eur genad welle den benanten Newfang zw nidern Lochen mit seiner zuegehorung der benanten meiner muemen Elsbetten der Zynespanin und iren eriben genedikleich geruechen ze verleichen und den chauff zw bestetten, also unvergriffenleich eurs goczhaws gewonhait und rechten, das wil ich gern umb eur genad verdienn. Mit urchund des briefs besigelt mit der erbern Mertten des Praitwiser purger zw Wels und Mertten des Chrannfues daselbs baider aufgedrukchten insigeln, die ich mit vleis darumb gepetten hab, in und iren eriben an schaden, wann ich dieczeit grabens insigel nicht enhett. Geben zw Wels am freytag vor dem palmtag in der heiligen vasten anno Domini etc. quadragesimo secundo.