Ich Lyenhart Stayner, Wernharten des Haydleins seling sun, vergich fur mich und all mein eriben und tuen kchundt offenleichen mit dem brief allen den er furkchumpt zw horen oder zw lesen von der zwspruch wegen, als ich gehabt hab von eribschaft wegen hincz Anna der Waldnerin, gesessen zw Vastarn in Mermoser gericht in Porchiricher pharr von des guetleins wegen zw Haslach in Gebolczchiricher pharr, darumb wir uns frawntleich und lyepleich geaint und verricht haben nach rat unser nachsten frawnt und ander frwmer leyt, und habt mir ain gelt herraus gesprochen, daran ich ain gancz vols genuegen gehabt hab. Ich verczeich mich auch des benanten meins eribtails auf dem obenanten guetlein gancz und gar in kraft des priffs fur mich und all mein eriben, also das wir darauf noch darnach hinfur nichtz mer zw sprechen noch zw vadern schullen noch wellen haben weder mit recht noch an recht, geistleich noch weltleich in kchayenerlay weis ungeverleich, ausgenomen, uns geb dan dan der tod icht rechtleich, des verczeichen wir uns nicht, und was wir oder ander yemant von unsern wegen gegen inn daruber an hueben, kchrigten oder rechteteten, es wer mit geistleichen oder weltleichen rechten, das haben wir uberall gegen in verlarn und sew gegen uns pehabt und gebunnen an aller stat, wo der briff furkchumpt. Mit urchundt des priffs versigelten mit der erbern Menten des Altags und Micheln des Hefter, payder aufgedruchten petschaft, dew wir mit fleyzz darumb gepeten haben, in und iren eriben an schaden und unnengolten der herschaft gerechtichait in allen sachen. Der sach sein zeugnus pet umb dew petschaft und tedinger item von erst Wernhart zw Haslach, Wernhart Prentelmayr, Taman Vasolt, taydinger, Hensel Tanczer, Ull Fleischacher, Oswald auf dem Weinperig und ander frum, leyt genug. Der priff ist geben am suntag vor aller heyling tag, do man zalt von Kchristi gepurdt virczehenhundert jar, darnach im ainsundvirczkisten jare.