Dem erwirdigen und geistleichen herren hern Jacoben abbt zw Lambach meinen genedigen lieben herren embeut ich Barbara, Hannsen des Spanring purger ze Wels hawsfraw, mein willig undertenig diennst bevor. Ich und mein man haben verchauft das gut am Lehen mit seinen zuegehorung, gelegen in Gunskircher pharr, darauf ich mein gemecht gehabt hab nach innhaltung ains gemechtbriefs, so mir darumb von euren genaden bestet und gegeben ist, Hainrich dem Leykeben ze Strass. Nu hab ich zu dem chauff mein gunst und willen gegeben und gib darauff eurn genaden mein gemecht auf und bitt eur genad diemutikleich mit allem vleis, ir wellet das vorgenant gut am Lehen mit seiner zuegehorung dem vorgenanten Hainrich ze Strass und sein eriben zu chauff bestetten und besiglen nach eurs goczhaus gewonhait und rechten, das ist mein gutleich wil und wort, und wil auch das gern umb eur genad verdienn, und gelob auch euren genaden mit mein trewn in aides weysse, das ich euren genaden hinfur in eur sigel nicht reden wil in chainem weg getrewleich und ungeverleich. Mit urchund des briefs besigelt mit des erbern und weysen Mertten des Praitwiser purger ze Wels aufgedrukchten insigel, den ich benante Barbara mit vleis darumb gepetten hab, im und sein eriben an schaden. Geben an suntag nach unser frawntag nativitatis Marie anno Domini etc. im xli jar.