Dem erwirdig[en] geistleichen herren hern Thoman abbt zu Lambach meinem genedigen h[errn] embeut ich Barbara, Hannsen des Spanring purger ze Wels hawsfraw, m[ein] willig gehorsam diennst. Ich und mein man haben verkauft das gut am Lehen in Gunskiricher pharr, darauf ich mein gemecht gehabt hab nach innhaltung ains gemechtbrief, so ich von euren genaden hab, Hannsen dem Leykeben zw Strass. Zw demselben chauff hab ich mein gunst, willen gegeben, und senndt euch dasselb mein gemecht widerumb auf mit dem brief und bitt eur genad diemutikleich, ir wellet dem benanten Hainrich ze Strass und sein eriben das vorgemelte gut am Lehen verleichen und zw chawff bestetten nach eurs goczhaws gewanhait und rechten, das ist mein gutleich will und wort. Und wil auch das gern umb eur genad verdienn, und gelob auch euch mit mein trewn, das ich ewren genaden hinfur darumb in eur sigel nicht reden wil in chainem weg ungeverleichen. Mit urchund des briefs besigelt mit der erbern und weysen Ulreichen Spiczbokchel und Lienharten des Chalshaubt baid purger ze Welcz aufgedrukchten petschaften, die ich mit vleis darumb gepetten hab, in und iren eribner an schaden. Geben zu Wels an mitichen vor unser frawntag als sy geporen ist anno Domini etc. xlj.