Dem erwirdigen geistleichen herren n. dem abbt zu Lambach embieten ich swester Petronella die Pokchlin, maistrinn des frawnklosters zu sand Jacob auf der hulben ze Wienn, und wir der convent gemain daselbs unser andechtigs gepet zu Got und lassen ewr erwirdichait wissen, das wir unser conventswester jungkfraw Affra Hannsen des Smidkramer seligen tochtter, allen den tail und gerechtikait, so dieselb unser conventswester von irer mueter seligen geerbt und gehabt hat an der wisen, des ir gruntherr seit, gelegen zu Wels bey dem Grunpach in des Michels Maricholczlein wisen, dem erberen Petern Motschir burger doselbs etc. ze chauffen gegeben haben. Bitten wir ewr erwirdikait mit ganczem vleis, ir wellet den egenanten Petern Motschir der benanten unserer conventswester gerechtichait und erbtail an der egenanten wisen nucz und gewer seczen und auch im ain chaufbrief darumb vertigen, als sit und gewonhait ist, das wellen wir umb ew gern verdienn, wann wir ew hiemit aufsenden alle die gerechtikait, so wir und unser egenante conventswester an der vorgenanten wisen gehabt haben. Mit urkund des briefs besigelt mit unser obgenanten n. der maisterin und des convents zu sand Jacob aufgedrukchten insigilln. Geben ze Wienn an freytag nach unser frawntag assumcionis anno Domini etc. quadragesimoprimo.