Ich Ulreich zw Beybaren und ich Mertt auf der Scheyben, ich Linhart von Schakchenrayt, wir allew vierew geswistret, ich Siman von Gaspelczhofen und mein hawsfraw Elspet und fur meiner lieben swester chind Anna, Margret, Magdalen, dafur ich mich wissenleich angenumen hab furstand sein von des chawffs wegen auf der Scheyben, ich Bolfgangen von Lebens hofstat, ich Michel sein brueder, ich Margret, ich Agnes und ich Linhart, ich Caspar und ich Matheus, wir allew sibenew geswistret. Erwirdiger, geistleicher, lieber herr, wir enpewten ewren genaden wir allen obverschriben unser willig gehorsam undertanig dinst und tun ewren genaden zw wissen, das wir unser gut, auff der Scheyben genant, ain virtall zw chawffen haben geben unserm lieben vettern Hainreichen dem Pekchen daselbs, Katrein seiner hawsfrawn, und Miklein von Tuttigen und seiner hawsfrawn in und allen iren eriben, bitten wir all obverschriben ewr genad, ir welt in den obenverschriben ainen chauffbrieff geben, daran tut ir sunder unser gefallen und dinst. Wann dan das ewr genad getan hat, so wellen wir all obenverschriben noch nymant von unsern wegen wider ewr sydel nymer mer sprechen und sentten ewch auch all obverschriben den auffgabbrieff. Zw urkund under des edeln Fridreichen des Perkaimer auffgedrukten insigel, der sein sydel von unser aller obverschriben auf den brieff gedruckt hat durich unser fleyssig pett willen, im und sein eriben an schaden, und sind zewgen der pett umb das sydel von erst Hanns von Sikkingen und Hanns Talhaimer, Hanns Gatringer. Der brieff ist geben als man zalt von Christ gepurd virczehenhundert jar, darnach im ains undvirczikisten jar des suntag nach sand Merteins tag.