Erbierdiger, geistleicher lieber herr. Ich Elspett dy Riczenbingklerin enpewt euch mein willig dinst. Ich tue euch zw wisen, das ich dy zwai gewch agker genant im Wingkel, und gelegen ob des margkchttes, verchawft hab Hansen dem Sneider zw Lambach. Da pitt ich euch diemuettickleich, ir welt im den chauf also pestetten nach seinn natturftten, das ist also mein fleisig gepet und guetleicher will, und wil das gern umb euch verdinen, und gib euch das also auf in chraft des briefs, den ich euch sikch, besigelten mit des erbern meins lieben aydem Hansen des Herysinger aufgetrukchtten insigel, den ich mit fleis darumb gepetten hab, im und sein eriben an schaden, darunder ich mich verpintt mit mein trawn alls das war und stat zw habn, das an dem brief geschriben stett, der geben ist nach der gepuerd Christy vierczehenhundertt jar und im ainsvierczigkisten jar am suntag nach sand Niclastag etc. etc.