Mein gehorsam und willig dinst bist alczeit genadiger lieber her. Ich lass ewr gnad bissen, als mein swester saligew Margreth Chyenerin gestorben ist, dovon mir angestorbem ist ein erbtayl auff dem drittayl des hoff ze Grueb, den der Artel saliger lassen hat, denselbem meinen erbtayl hab ich ze chauffen gebem nach ratt frumer layt [Nik]losen des Prannt, richter ze Tulbingen, Erhartten des Chlueg, Hansen des Stapphelpawr, Stephan des Chotinger, all geswaten? doselbs, Tamann meinem liebem geswein und Kathrein, meiner liebem swester umb iij tal. den. Derumb so bet ich, ewr gnad well in denselbem drittayl leichen und seczen nucz und gwer all iren frum hinfur domit ze schaffen und ich der selbem sum geldes schon beczalt pin, derumb auch ich noch mein erbem hinfur von der lechenschafft wegen chaynen zuspruch nicht schol habem, das ist mein gutter bil. Depey sind gebesen dy obgenanten ze Tulbingen. Datum proxima dominica post festum sancti Pangracii anno Domini cccco xlio.

Anna Bielanntin ze Tulbingen