Wir Thoman von Gottes genaden abbt ze Lambach bekennen mit dem brief, das fur uns komen ist Jorig von Paselstorf und hat mit wolbedachtem mut und gutem willen recht und redleichen verkaufft ain wisen, genant die Scheybelwisen mit aller irer zugehorung, so von altter und durich recht darzu gehort, darinn nichtz ausgenomen noch hindan gesatzt angever, die gehort hat in das Mittergut ze Paselstorf, gelegen auf Paselstorffer aw in sannd Mareinkircher pharr, Hannsen dem Topler ze Ottingdorf, seiner hausfrawn Kathrein und irn baiden eriben umb ain sum gelts, der er gantz ausgericht und beczalt worden ist zu rechtten tagen an allen schaden. Also haben wir im, dem yetz benanten Hannsen, seiner hawsfrawn Kathrein und irn baiden erben die benanten wisen mit aller zugehorung zu rechttem kauf und eribrecht bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaws all jar jarleichen davon raichen und dienn sol zu unser lieben frawntag der dinstzeit funf Wienner phenning. Auch ist ze merkchen, ob sich begeb, das der benannt Hanns, sein hawsfraw oder irer baider eriben die gemellt wisen verkauffen wolten oder mussten, so sullen sew dy den obenanten Jorigen oder sein eriben ee an notten und ze kauffen geben fur ainen fromden, oder wer das benant gut ze Paselstorf innhat und besitzt. Mochtten oder wolten sew aber die benanten wisen nicht kauffen, so mugen sew dy geben ainem anderm irm genossen, der uns, unserm gotshaws auch in nutz und fugsam sey. Es ist auch der obgemeltt Jorig und all sein erben der benanten wisen mit aller zugehorung des gemeltten Hannsen, seiner hawsfrawn Kathrein und irer baider eriben rechtt gwern und furstandt fur all rechtleichew ansprach, wo in des not und durft beschiecht mit dem rechten, als dann soleichs kaufs, eribrechts und lanndes ob der Enns recht ist. Wir offen auch, das sy kainerlay wanndlung damit nicht habn sulln in kainerlay weys an unser hanndt und gutem willn, und sulln uns auch alles das davon leyden und dulden, das annder unsers gotshauss eribler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundainsundvierczigisten jaren an mantag vor sannd Petronelln tag der heiligen junkchfrawn.