Ich Hanns yecz ambttman zu Wilhering und ferig dasselbs enpeutt dem erwirdigen geistleichenn herren N. dem abbtt zue Lambach meinem genedigen herrenn mein gehorsam willig dienst bevor. Ich tun ewirr erwirdichait zu wissen, das ich ain guett verkaufft hab, genantt in der Lankchwysenn in Puechkircher pffarr gelegenn, das ew und ewrem gotshaus dienstpar und davonn zue lehenn ist, meinem swager Wolffgangenn Wedester und meiner swesterr Angnesen seiner hausfrawenn. Pitt ich ewerr erwirdichaitt, ir wellett das benantt guett meinem benannttenn swager und meiner swester leyhenn und in das mitt brieff und sigelnn bestetten nach ewers gotshaus und gewonhayttenn rechttenn, das will ich mitt vleis umb ew und ewirr gotshaus verdienn, und versprich ew hinfur in ewir insigell nichts zue redenn. Des zue urkund gib ich ew denn brieff, besigelttem mitt des erberm weysenn Wolffgangenn vonn Hilkering diezeitt landttrichtter im Tunawtall auffgedrukchttem insigell, den ich mitt vleis darumb gepetenn hab, im und sein eribenn an schadenn, under das insigell ich mich obgenantter Hanns verpindtt mit meim trewnn in aides weysse alles das war, stett zu haltten, das an dem brieff veschribenn ist. Gebenn denn suntag nach sannd Pangraczentag nach Christy gepurdtt vierzehenhundertt und im ainsundvierzigkstenn jare.