Dem erwirdigen gaistleichen herren hern Thoman abtt zu Lambach embeut ich Dorothea Ulreichen des alten Stolln salign tachter mein undertanig gehorsam dienst wisset allzeit bevor. Ich lass ewr gnad wissen, das ich meinem lieben vetter Merttn dem Stolln, meiner swester Margreten salign sun, gemacht und verschriben hab czehen pfunt pfennig auf meinem hof zu Gruenpach und auf der mul daselbs gelegen in Otnanger pfarr, also in der weschaiden, wann ich mit tad abgee, so sol er sich des guts mit aller zugehorung auf hof und mull, zu holtz, wismad und akcher, als mich dann meins tails gleichleich aneribt, underwinden und innhaben, nuczen und niessen und darumb sol er mir durch hail und trost meiner sel ain Romfart gen dem heiligen sand Peter ausrichten, und wann das ist, das n. meiner tachter kindt und meinew liebe enenkchel zu vogtpern jarn komen, dieselben sullen im geben oder aber seinn erben die benanten czehen pfunt pfening, darnach sullen sy meinen enenkchel meins vorgenanten eribtails zestund widerumb abtreten. Giengen aber meinew enenkchel mit tad ab an leiberben, so sol es Mertten dem Stollen, Barbara seiner hausfrawn und irn baiden erben zugevallen als dann recht ist. Auf das bitt ich ewr gnad mit allem vleiss, mit undertanikait, ir wellz dem vorgenanten Mertten, seiner hawsfrawn und irn eriben des obgenanten gemachts und verschreiben der czechen pfunt pfening und anderer sach als hieinn begriffen ist auf dem vorgenanten guts und mul meins gleichen eribtails ainen brief fertigen und bestatten mit ewerm insigel. Und wann ir das tan habt, so sult ir und ewer gotshaws von mir und mein erben an zuespruch sein. Urkunt dicz briefs, den ich darumb gib, besigelt durch meiner vleissigen pet willen mit des edeln Leonharten des Aboldinger und der erbern Hannsen des Pubenperger baider aufgedruchten insigel, in und irn erben an schaden. Der sach und pet umb die insigel sind czewgen die erbern Niclas Reiss, Wolfgang Widmer zu Unkchnach, Hans Huliger von Pleczenod, Hans von Czell. Geben an suntag vor sant Jorigentag anno Domini etc. quadragesimoprimo.