Ich Ott Galler diezeit pharrer ze Gunskirchen bekenn fur mich und all mein nachkomund pharrer und frewndt offennleichen mit dem brief aller meinkleichen den er furkumbt ze horen oder ze lesen, als mir der erwirdig geistleich mein lieber herr her Thoman abbtt des gotshawss ze Lambach die pewnt, di weylandt Hainreich Kagerl seliger inngehabtt, verlichen und in sein urbar geschriben und in seins gotshawss hat, gelegen in des benanten gotshawss purkchfrid ze Strozz nebm des Wilhalm daselbs pewnten, doch also mit solhen ausgenomen wordten, das ich benanter Ott Galler noch mein nachkomen die pewnten zu meiner pharrkirchen Gunskirchen nicht raichen noch prawchen sullen, noch dem gotshaws Lambach enphromden wellen noch kainem anderem gotshaus nicht zuefuegen in kainerlay sachen noch weys angever. Ich sol und wil auch die benanten pewnten kainem zu naichen noch geben, der dem benanten abbt, seinem gotshaws und nachkomen nicht fugsam wer. Wie es sich sunst anders verwanndelt meinthalben, das ich es gebn ainem frewndt oder fromden wolt, das sol albeg beschechen in wiegetaner mass [...] das fuegtt mit gunst und willen ain yeden herren des gotshawss ze Lambach. Und wie es sich denn mit den verwanndelt, die den benant pewnt nach mir besiczent, dieselben sulln dann aynem yeden herren und abbtt des gotshauss ze Lambach mit der benanten pewnten damit trew, gehorsam und gwerttig sein, desgleichs ich benanter Ott Galler auch, und sullen auch alles das davon leyden und dulden, das annder des gotshawss ze Lambach lewt gesessen im purkchfrid ze Strozz gein in leydent und duldent unverczigen des benanten gotshawss Lambach rechten und vordrung in allen sachen und in solher beschaiden, das ich obenanter Ott Galler oder wer die benanten pewnten mit willen und gunst, so vorberurt ist, innhat, raichen und dienn sullen all jar jarleich nach innhaltung des gotshauss ze Lambach urbarpuch lawtt und sag. Ze urkund gib ich obgemeltter Ott Galler der vorberurten sachen zu ainer waren stetikait fur mich und all mein nachkomen dem erwirdigen meinem lieben herren abbt Thoman, seinem gotshaws und nachkomen also den offen brief, besigeltem mit meinem anhanngundem insigl, durch mererr gezewgnuzz und sicherhait hab ich mit vleyzz gebeten den erbern Wolfganng den Kurczen burger ze Wels, das er sein insigel mitsambt meinem insigel an den brief gehanngen hat, im und allen sein eriben an schaden. Der brief ist geben, als man zalt nach Kristi geburde in dem vierczechenhundert und vierczigisten jaren an mitichen Mathie apostoli.