Ich Anna, Leonharts hawsfraw, der dyczeit des Anczentaler sagmaister ist, und ich Marigret des Gabrihelen zw Reyt hawsfraw, wir bayd swesteren, wir enpietten dem erwirdigen geistlichen unserm genadigen herren herren Thoman abpt zw Lambbach unser willig undertanig dienst wist allczeit bevor. Lieber herr, wir lassen ewr genad wissen, das wir unsern eribtail zw Arminng verkauft haben unserm lieben vettern dem Thoman und allen seinen eriben, des dyzeit Thoman Schuester zw Nyderenentteren gerhab ist. Also bitten wir ewr genad undertanigkleichen, ir wellet im ein brief daruber siglen dem obgenantten unserm vettern Thomann, das ist alles unser guetleicher willen, und das wir dawider nichtz reden schullen noch wellen in chainerlay weyse getrewlich und an alles geverde. Des zw urkund geben wir euch den offen petbrieff, versigelt under des edlen und weysen Eberharts des Kyrichsteiger aygen furgedrukchtten insygel, den wir fleizz darumb gepetten haben, im und seinen eriben an schaden, darunder wir uns mit unsern trewn verpintten alles das war und stat zw haltten, das oben an dem brief geschriben stet. Der gepet umb das insigel sind czeugen Steffan von Hoczein und Peter von Reyt. Der brieff ist geben an nagsten montag vor sand Mathewstag anno Dominii mo cccco im xlo jare.