Ich Hanns Schusling, ich Fridreich Scherer, ich Mert Kneyssel, ich Hanns Pranpekch, ich Perchtold Pader, all burger ze Grieskirchen, bekennen offennleichen mit dem brief aller manikleichen, den er furkumbt ze horn oder ze lesen, das Anna, Lienhartz von Aygeltsperg hawsfraw, Ulreichs Pondel rechttew tachtter ist, dann der yetz benant Ulreich Pondel ist Benedicten des Pondel weylandt seligen rechttter sun gewesen, so ist dann das lechen ze Oberndorf bey dem Gatern in Puchler pfarr gelegen hinder dem erwirdigen gotshaws ze Lambach der benanten Anna von den gemelltten Pondeln ir rechtz vaterleichs und endleichs erib. Das uns darumb umb die pekanndten sachen also kund und gwissen sey, das sprechen, reden und erkennen wir bey unsern trewn an aydes stat, als wir das dann vor recht erkennen schulten. Ze urkund der sachen geben wir des also den offenn brief, besigeltem mit der erbern weisen Lepolten des Sperl, diezeit pfleger zu Tegernpach, und Hannsen des Egkmayr, diezeit ambtman zu Haselaw, der Steffanischen aigen baider aygen aufgedrukchttn insigeln, die das tan habent durch unser vleissigen gebet willn, in baiden und alln iren eriben an schaden. Geben als man zalt nach Kristi geburde in dem vierczechenhundert und newnunddreissigisten jaren an mantag nach Conversio sancti Pauli.