Ich Elspett amb Pullar und Anna ir swester de Pergerin, und ich Lienhartt amb Aygn und all unser erben und mit erbn, und ich Margredt, Ullreichs weib czu Puchlewttn, enpiettn dem erwirdign und geistlichen unserem genadigen liebn herrn hernn abbtt Tamann czu Lambach unsern willing dinst. Wir lazzen ewr gnad wissen, daz wir Ullreichn und Lienhartn und Hannsn Schuster czu Gebolczchirchenn und irn hausfrawn Katrein und Margrettn ze chauffn gebn habn unser sibntaill in dem obern guett czu Edming, pit wir ewr gnad, ir wellet dasselb sibenttaill mit ewrm brieff und sygll bestettn. Wann ir das also tan habt, so w[oll]n wir all obgenanten noch all unser erbn in ewer sygll nicht redn und schullt auch dez an ewrm sygll und gotzhaws rechttn unnengolttn sein. Dez sennt wir auch den pettbrieff under des edln weysn Fridreichenn des Perkchaimer aygn auffgedrukchttn insigll ym und all sein erbn an schadn. Des pettbrieff und sygll sind zewgn Lienhartt amb Pullar, Smid zu Gebolczchirchenn, Taman Mulner zu Talhaim, Hanns Czawnner und ander frwmer lewtt genueg. Gebn amb mittichn vor Pauli nach Kristi gepurdt virczehnhundert jar und in dem newnunddreyssigistn jare.