Ich Wernhartt, ich Ulreich, ich Lienhartt geprueder, und ich Chunratt ir swager enpietten dem erwirdigen unserm genadigen lieben herrn herrn abbtt Tamann czu Lambach unser gehorsam willig dienst. Wir pittn euch mit allm vleizz, ir wollet Nikla dem Golhaffn czu Langgaw unsern taill, so wir gehabt habn an dem Hochenrod an der mull in einem drittaill de virttaill in der obgenantn mull. Dew selbing taill haben wir ze chauffn geben Niklasn dem Golhaffn, Katrein seiner hausfrawn, ir wellet inn de selbing bestetten mit brief und insigll. Wan ir daz getan habt, so wellen wir all obgenant noch all unser erben dawider nymermer sprechen, und scholt auch ir an ewrm sigll und gotzhawcz unnengoltten sein. Dez sennt wir euch den pettbrieff under dez Fridreichen des Perchkaimer aigen aufgedrukchen insigl, daz er durich unsrer vleissing pett willen auff den beddtbrieff gedrukcht hatt, im und sein erben an schaden, und dez pettbrieffs und sigll sind zewgen Lienhartt amb Pullar, Ullrich Smid zu Gebolczchirchen und Hanns Schuster daselbs, und Hanns Czawnner und ander frwmer lewtt genueg. Gebn amb erichttag. vor sand Pawlztag nach Kristi gepurd virczehnhundert jar und im newnunddreyssigisten jare.