Ich Wernhartt Gollss enpewtt dem erwirdigen meinen genadigen lieben herrn herrn abbtt Taman czu Lambach mein gehorsam willig dinst. Ich pit euch mit aln vleizz, ir wellet Niklasen dem Golhaffen czu Langgaw und Katrein seiner hawsfraw und alln irn paidn erben mein sechstaill, so ich in chauffweis gehabt hab auff der mull genant dacz dem Hahenrad, das ich dem vorgenanten Niklasn und seiner hausfrawn und alln irn baidn erbn cze chauffn geben hab, ir wellett in dasselb sechstaill bestettn mit brieff und sigll, und wann ir das also tan habt, so will ich noch all mein erbn dawider nymermer sprechen und schult auch dez an ewrm sigll und gotzhaws hinfur unnengoltten sein, wenn ez ist mein will und pett, dez sennt ich euch den pettbrief under des edln Fridreichn des Perkchaimer aign auffgedrukchtn insigll, das er durch meiner vleissing pett willn auff den pettbrieff gedrukcht hat, im und sein erbn an schadn, und dez petbrieff und sygll sind czeugenn Lienhartt amb Pullar, Ullreich Smid zu Gebolczchirchn und Hanns Schuster daselbs und Hanns Czawnner und ander frwmer leytt genueg. Gebm amb erichttag vor sand Pawlstag nach Kristi gepurdt virczehnhundert und im newnunddreyssigisten jare.