Wir Thaman von Gotes genaden abbtt ze Lambach bekennen mit dem brief, das fur uns komen ist Peter Kaufinger und hat mit wolbedachtem mut und gutem willn recht und redleichen verkaufft ain haws und hofmarich mit aller seiner zugehorung gelegn enhalben des pachss czwischen der alten hofmul und des Braxater haws und dritthalb jewch akcher gelegen in den markchvelden alles in unserm purkchfrid hie ze Lambach, Paulein dem Raindel, seiner hawsfrawn und allen sein erben umb ain sum gelts, der er gancz beczalt ist worden zu rechtten tagen an allen schaden. Also haben wir dem yetzgemeltten Paul, seiner hawsfrawn und allen sein eriben die vorgemeltten haws, hofmarich und dritthalb jewch akcher, yedes und alles mit seiner zugehorung, so von altter und durch recht darzu gehort, darinn nichts ausgenomen noch hindan gesacztt angever, bestett und verlichen zu rechttem kauf und purkchrecht, was wir in rechtleichen daran bestetten und verleichen sullen oder mugen in der beschaiden, das man uns und unserm gotshaws all jar jarleichen davon raichen und dienn sol in unser oblay zu unser lieben frawntag der dienzeit ain halb pfunt Wienner pfennig und zu unser lieben frawntag der liechtmezz ain halb pfunt Wienner pfennig, und in unser abbtey sullen sy uns von den gemeltten haws und akchern jarleich dienn nach innhaltung unsers urbar. Es ist auch der benant Peter und all sein eriben der gemeltten haws, hofmarich und akcher und aller zugehorung des benanten Paulein, seiner hawsfrawn und aller seiner eriben rechtt gewern und furstanndt fur all krieg, invall oder ansprach, wo und wann in des not und durft beschiecht mit dem rechtn, als dann soleichss kawffs, purkchrechtz und lanndes ob der Enns recht ist. Wir offenn auch, daz sy kainerlay wanndlung damit nicht haben sullen in kainerlay weys an unser hanndt und guetem willen, und sullen uns auch alles das davon leyden und dulden, das annder unsers gotshawss lewt gesessen hie in unserm purkchfrid ze Lambach gein uns leydent und duldent unverczigen unsers gotshaws rechten in allen sachen. Ze urkund geben wir in des also den offenn brief, besigeltem mit unserm anhanngunndem insigel. Geben als man zalt nach Kristi geburde in dem vierczechenhundertundachttunddreissigisten jaren an freytag vor nativitatis Marie.