Wir Thaman von Gottes genaden abbt ze Lambach bekennen mit dem brief aller menikleichen, den er furkumbt ze horn oder ze lesen, das fur uns komen ist Lienhart Hardrer, burger ze Wels, und hat mit wolbedachtem muet und gutem willen recht und redleichen verkaufft dritthalb tagwerich wismad, gelegen im Oberveld ze Mostal in Gunskircher pfarr mit allen zugehorungen, so von altter und durch recht darzue gehornt oder davon bekomen mugen, darinn nichts ausgenomen noch hindangesatzt angever, seinem leben stewfvater Linhartten dem Kalbshawpp, Kathrein seiner hausfrawn, des benanten Handrer rechtte mueter und allen iren baiden erben, wenn die obgemeltten dritthalb tagwerich wismad sind der yetz gemeltten Kathrein leibgeding gewesen, des wir erweist worden sein mit urkunden, ausganngen von unserm vorsedel abbtt Johannsen seligen gedechtnuss, umb ain sum gelts, des er gantz und gar ausgericht und beczalt worden ist zu rechtten tagen an allen schaden. Also haben wir in den yetz benanten Lienharten dem Kalbshawpp, seiner hawsfrawn Kathrein und iren baiden erben die gemeltten dritthalb tagwerich wismad mit irn zugehorungen bestett und verlichen, was wir in rechtleichen daran bestetten und verleichen sullen oder mugen zu rechttem kauf und erbrecht in der beschaiden, das man uns und unserm gotshaws all jar davon raichen und dienn sol zu unser lieben frawntag der dienstzeit czechen Wienner pfennig. Es ist auch der obgemeltt Linhart Harder und all sein eriben der gemeltten dritthalben tagwerich wismad mit iren zugehorungen des benanten Linharten Kalbshawpp, seiner hawsfrawn Kathrein und irer baider eriben recht gwern und furstandt fur all rechtleiche ansprach, wo und wann in des not und durft beschiecht mit dem rechten, als dann soleichs kauffs, erbrechtz und lanndes ob der Enns recht ist. Wir melden auch, das sy kainerlay wanndlung damit nicht haben sullen in kainerlay weis an unser hanndt und gutem willen, und sullen uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offen brief, besigeltem mit unserm anhanngundem insigel. Der brief ist geben als man zalt nach Kristi geburd in dem virczechenhundert und achttunddreissigisten jaren am sambcztag vor sannd Scolasticatag der heiligen junkchfrawn.