Dem erwirdigen geistleichen hern Thoman abt zu Lambach enpeut ich Affra die Frawndorfferin, Casparn des Hawnolten seligen witib, meinn willig dinst zevor. Ich tun ewer erwirdigkait ze wissen, das ich mein wis, benant die Salczmanswis mit irer zugehorung ze kauffen geben hab Ulrich dem Egkmair purger zu Wells nach innhaltung aines kauffbriefs, den er von mir hat, und die von ew und ewrn gotzhaws eriblehen ist. Dieselb mein gerechtigkait, die ich daran gehabt hab, sent ich ewern erwirdigkait auf wissentleich mit dem brief, und pitt mit allem vleiss, eur erwirdigkait welle dieselben wisen mit irer zuegehorungen dem Egkmair nach innhaltung seins kauffbriefs bestetten, als dan ewr und ewrs gotzhawss rechten und gewonhait ist, das wil ich gern umb ewr erwirdigkait verdyenn. Mit urkund des briefs besigelt mit meins liebens sun Merten des Cranfues aufgedrukten insigel, und zu guter geczeugnuss des erbern Wolfgang des Curczen, diczeit ainer des ratz diczeit zu Wells, auch aufgedrukten insigel, den ich mit vleiss gepeten hab, im und sein eriben an schaden. Geben an mantag vor Leonardi anno tricesimoseptimo.