Ich Hanns der Mair zu Posendorff, ich Marigret sein hausfraw des Mulpekehen saling tochter, wir veriehen fur uns und fur all unser eriben die wir haben oder gewinnen mit dem brieff allen den und er furchumbt, das wir mit wolbedachtem muet recht und redlich zu der czeit und wir es mit recht wol tun machten mit herrn hannt und aller stat zu chauffen geben haben Hannsen dem Ostermair zu Rechkering, seiner hausfru Elspeten und iren miteriben Stephann am Hilprechczperig und seiner swester Annen und allen iren eriben, die si habent oder gewinnent, unser drittail des zehencz zu Loch, gelegen in Otnanger pharr, der recht lehen ist von dem edlen Sygmunden dem Perntaler, unser drittail desselben zehent haben wir in geben und mit stater furczicht ingeantwurt aus unser nucz und gewer in ir nucz und gewer umb ain gelt, des wir von in gancz beczalt und ausgericht sein zu rechter czeit und an allen schaden, und sullen si den inne haben, nuczen und nyessen und allen iren frum damit schaffen mit verseczen, verchauffen, geben ungeirret wem si wellent. Wir sein auch unsers drittails des benanten zehencz zu chauff ir recht gewern und furstant fur alle rechtliche ansprach, wo oder wenn in des mit recht, not und durfft geschiecht, also lehens und lanndesrecht ist ob der Enns. Ging in von uns mit der gewerschaft, des si zu schaden choment mit recht ichcz ab, den schullen si haben und bechomen von uns und von aller unser hab, wo wir die haben oder lassen, und geben in des zu urchunt den brief mit des edlen Achaczen des Rawtter, dieczeit gerhab des vorbenanten Perntaler, anhangundem insigel, yem und seinen eriben an schaden und unverczigen des Perntaler vadrung und rechten, den wir mit vleizz darumb gepeten haben und uns darunder verpinten mit unsern trewn stat zu haben und geschriben stet an dem brieff, der geben ist am samcztag nach sand Erasemtag nach Christi geburdt virczehenhundert und in dem virunddreissigisten jare.