Ich Eberhart Kyrichsteiger, ich Jorg von Eisenharzhaim dyzeit czechmaister, und ich Hans Perr von Veichtach, und Jorg von Forstoren und ich Hanns Swarczhadel zw Kyrichsteig, und ich Chonrad von Pubenperig und ich Thoman von Echk, und ich Thoman von Czeilorn und Thoman von Albrechczhaim und ich Strass Ulreich von Eczling und ich Leonhart von Walching und ich Hanns von Murring und Hainreich Chobelstater von Eczling pekenen offenlichen mit dem gegenburtigen prieff, als des Symon Langstadel das guet ze Eczling gechauft hat, das wir in von demselben chauff nie lassen haben wellen, und hat uns auch dasselbig gelt verparigt, das uns das allen, als wir oben penent sein, wissenlichen ist, und sprechen auch das pey unsern trewen. Czw urchunt geben wir den prief versigelt unter des edlen und weysen Eberharcz des Kyrichsteiger furgetrukchten insydel, den wir all, als wir oben penent sein, umb sein insydel fleisz gepeten haben, im und sein eriben an schaden. Der prieff ist geben an sand Steffanstag czbischsen der new als man czalt von Christy gepurd vierczehenhundert jar und darnach im vierunddreyssigisten jar.