Ich Reinprecht von Wallsse hawbtman ob der Enns bekenn, das fur mich kom mein getrewer Michel Galannder, mein schaffer ze Lynncz, und pat mich diemutikleich mit fleyss, das ich im von sundern gnaden gerucht zu verleichen zway gueter zu Erlach in Varichdarffer pharr gelegen, der herschafft zu Sewsenburg lehenschafft, wann mir die vermant und ledig worden und mit taidingen, spruchen und mit losung von ettleichen, dy dann zu denselben gutern gerechtigkait mainten zu haben an in komen weren, das ich also durich seiner fleyssigen pet willen und dinst, dy er mir uncz her getan hat und hinfur tun sol und mag getan, und im dieselbem obgenantten guter mit irer zugehorung verlichen hab und leiche auch wissentleich mit kraft diczs brieves, was ich im dann zu recht daran verleichen sol oder mag, also das er und sein erben dy nw furbaser von der egenantten herschafft in lehensweis innehaben, nuczen und nyessen sullen und mugen, als lehens und lanndes ob der Enns recht ist ungeverleich, doch der egenantten herschafft zu Sewsenburg an der lehenschafft unvergriffenleich. Mit urkundt des brieffs besigelt mit meinem anhangundem insigl. Geben zu Lynncz an suntag vor sannd Giligentag nach Chrisst [g]epurde virczehenhundert jar und darnach in dem virunddreyssigesten jare.