Wir Johanns von Gotes genaden abbt ze Lambach bekennen mit dem brief, das fur uns chamen ist Magens Fledrer ze Freyhaim und hat rechtt und redleich verkauftt das Semelgut ze Freyhaym, geleich halbs, mit seiner zuegehorung gelegen in Widemspekcher pharr, sunnder hat er im ausgenomen das haus halbs und ain wis flekch nahent da pey gelegen, seinem sun Stephan, seiner hausfraun und sein eriben umb ain summ gelts, des er gantz beczalt ist. Also haben wir in das egemelt halbguet, ausgenoman das halb haus und den wisflekch gants, mit aller seiner zuegehorung, so von allter und durch recht darczue gehort angever, verlihen und bestett zu eribrecht in der beschaiden, das man uns und unserm gotz haus alle jar jerleich da von dienn sol nach inhalttung unnsers urbarpuechs. Es ist auch der vorgemelt Magens Fledrer und sein eriben des egemelten halben guets als vor beruert ist, des benanten seins sun Stephan, seiner hausfraun und seinen eriben ir rechtt gewern und furstand fur all rechtleich ansprach, als dann kauffs, eribrechts und lants ob der Enns recht ist. Und nach abgang des vorgemelten Magens schol das vorgemelt halb haus und der gantz wisflekch eriben und gevallen auch zw dem vorgemelten halben guett. Wir melden auch, das sy kainerlay wandlung da mit haben sullen in chainer weis an unnser hant und gueten willen und schullen auch alles das davon leiden und dulden, das ander unnsers gotshaus eribler gein uns leiden und dulden unverczigen unnsers gotshauss rechten in allen sachen. Mit urchund des briefs unnder unnserm anhangunden innsigel geben ist nach Kristt gebuerde vierczehen hundert und dar nach in dem drew und dreyssigisten jare an sambcztag nagst vos sand Kolomans tag des heiligen martrer.