Ich Galannder, die zeit meins genedigen herrn hern Reinprechts von Wallsse haubtman ob der Enns schaffer ze Lynncz, bechenn, das mir der erwirdig geistleich herr abt Johanns ze Lambach ausgericht und bezallt hat sechczigk phunt phening, die gevallenn sind ze vogtrecht gen Drattennegk des verganngen vierczchenhundertisten und zwayunddreissigistenn jar und des yecz vierczechenhundertistem drewunddreissigisten jar, sag ich den benanten abbt Johanns der benanten phening an stat meins genedigen herrn von Wallse quidt und ledig. Mit urkundt des briffs besigelt mit meinem aufgedrukchtem petschadt. Geben ze Lynncz am phincztag nach sand Michelstag anno Domini etc. xxxiiimo.