Wir Johanns von Gotes genaden abbt ze Lambach bechennen mit dem brief umb die Salczmans wis, so die erber fraw Affra, Kasparn des Hawnolten seligen bitib, gekauftt hat von Hannsen dem Hawnolten nach lawt des kaufbriefs dar uber gegeben. Derselb Hawnolt, auch sein brueder Jorig an stat irs brueder Merttein, der noch nicht vogtper ist, all Kasparn des Hawnolten seligen enenkchel, auch Agnes die Gulherin ind Magdalen die Kunstmanin, des vorgemelten Kasparn seligen tachtter, der benanten Affra ubergegeben haben ir warttung, so sy auf dem wislein gehabt haben, das an dy Salczman wis hin an leit und ruert an den wagen weg, das ir vor mit der sellden ze lehen zuegeschriben und gemachtt was unverchumert ir lebtteg inne ze haben. Dasselb wisel hab wir der egemelten Affra umb ir aller pet und dienst willen zw der Salczmanwis verlihen und bestett zu eribrecht, also was wir ir durich rechtt danan bestetten sullen oder mugen in der beschaiden, das man uns und unserm gotshaus alle jar da von dienn und rayhen sol nach innhaltung unsers urbars. Wir melden auch, das sy kainerlay wandlung damit haben schullen in chainerlay weis an unser handt und gueten willen und unverczigen unser und unnsers gotshauss rechten in allen sachen. Des ze urkund geben wir ir den brief, besigelten mit unserm anhangunden insigel, der gegeben ist nach Kristt gebuerd vierczehen hundest jar und dar nach in dem drew und dreyssigissten jare an mantag nagst nach sand Mertheins tage.