Mathias Dei et apostolice sedis gracia episcopus Vittricensis, cooperator in spiritualibus reverendissimi in Christo patris ac domini domni Leonardi episcopi Pataviensis ecclesie salutem in omnium salvatore. Alma mater ecclesia, que omnem hominem salvari desiderat et neminem wlt perire, fragilitatem humane nature considerans, que assidue labitur ad delicta, spiritualia quedam adinvenit remedia, quibus assidue peccantes satisfacere valeant indulgencias videlicet remissiones per quas, qui se in promerendis eisdem devocius exercitaverint suorum assequantur veniam delictorum eciam cum officii nostri pastoralis debito omni piorum locorum veneracioni et incrementis intendere teneamur. Sane igitur illis in ecclesia monasterii sancti Kiliani in Lambach ordinis sancti Benedicti, Pataviensis dyocesis, predicte locis ac inhabitantibus ibidem, ubi observancia totalis discipline viget regularis ac aliasque multa pietatis opera, per que altissmi misericordia copiosius queat promereri, ibidem frequencius usitantur. Hinc est, quod nos anno Domini millesimo quadringentesimo trigesimo tercio penultima die mensis novembris ipsam ecclesiam monasterii in Lambach rite spiritu sancto cooperante ad cautelam duximus reconsecrandam et reconsecravimus eandem cum summo altari in honore sancti martiris Kiliani, quod aciam de novo eodem die consecravimus, cuius dedicacio celebranda erit singulis annis proxima dominica post festum exaltacionis sancte crucis per transposicionem, die vero ultima eiusdem mensis in ecclesia prefata quinque altaria de novo erecta, in medio ecclesie altare in honore sancte crucis, duo altaria unum in honore corporis Christi, secundum in honore sancti Georii martiris et beate Barbare virginis et martiris, a dextris alia duo altaria, unum in honore omnium apostolorum, aliud vero in honore sanctorum Johannis Baptiste et Johannis apostoli et ewangeliste a sinistris in ipsa ecclesia situata divina clemencia nobis cooperante consecravimus, dedicacio horum quinque altarium erit celebranda in die sancti Andree apostoli. Continentur autem in ipsis altaribus reliquie prout in epitaphys desuper confectis clarius demonstratur. Die vero prima mensis decembris ambitum inter septa dicti monasterii de novo in cimiterium invocata spiritus sancti gracia rite consecravimus, die vero quarta mensis decembris ecclesiam parrochialem sanctorum Johannis Baptiste et Johannis apostoli et ewangeliste cum suo cimiterio reconciliavimus. Hec autem omnia ad laudem et honorem sancte et individue trinitatis perfecimus, specialiter autem in honore sanctorum, ut superius clarius et expressius continetur. Cupientes igitur, ut dictum monasterium cum capellis et altaribus eciam parrochiali ecclesia annexis congruis frequententur honoribus, prout idem monasterium per universos christifideles devocius et populosius frequentari desideramus, generaliter igitur omnibus christifidelibus vere penitentibus confessis et contritis, qui dictum monasterium capellas, altaria, necnon ecclesiam parrochialem in diebus patronorum sew patronarum dedicacionem eorum devote visitaverint ac aliis festivitatibus infrascriptis videlicet nativitatis Christi, circumcisionis, epiphanie et per totam quadragesimam, parasceven, pasce, ascensionis, pentecostes, trinitatis, corporis Christi, invencionis et exaltacionis sancte crucis, in omnibus et singulis festivitatibus beate Marie virginis, sancti Michahelis archangeli, nativitatis et decollacionis beati Johannis Baptiste, beatorum apostolorum Petri et Pauli ac omnium aliorum apostolorum et ewangelistarum, sanctorumque Stephani, Laurencii, Vincencii, Christofori, Floriani et Georii martirum, sanctorum Benedicti, Martini, Nicolai, Gregorii, Augustini, Jeronimi, Ambrosii confessorum, sanctarum Marie Magdalena, Katherine, Margarethe, Barbare, Cecilie, Lucie, Agathe, Agnetis et undecim milium virginum, in festo omnium sanctorum et in commemoracione omnum animarum et per octavas dictarum festivitatum octavas habencium singulisque diebus dominicis causa devocionis et oracionis aut peregrinacionis causa accesserint, sew qui missis, predicacionibus, matutinis, vesperis, aut aliis quibuscumque divinis officiis ibidem interfuerint aut corpus Christi vel oleum sacrum, cum infirmis portentur, secuti fuerint, sew in serotina pulsacione campane aut in mane secundum modum curie Romane ter Ave Maria dixerint, necnon qui ad fabricas, luminaria, ornamenta aut quevis alia dicte ecclesie necessaria manus porrexerint adiutrices aut aliquod aliud caritativum subsidium donaverint, quocienscumque premissa vel aliquid premissorum fecerint, de omnipotentis Dei misericordia et beatorum Petri et Pauli apostolorum eius confisi suffragiis quadraginta dies indulgenciarum de iniunctis eis penitenciis misericorditer in dominus elargimur, presentibus perpetuis temporibus duraturis. Ad indulgenciarum vero huiusmodi largitatem pura discreta et conversacio religiosa fratrum necnon devota supplex peticio videlicet domini Johannis Dachsperger abbatis, Thome prioris ac aliorum fratrum nos paterne provocavit. Datum et actum in monasterio predicto sub anno domini millesimo quadringentesimo trigesimo tercio quarta die mensis decembris, harum testimonio literarum nostri sigilli appensione munitarum.