Wir Johanns von Gotes genaden abbt zee Lambach beckennen, das fur uns komen ist Hanns Vischer ze Staig und hat erlost an stat seins brueder Ullreichen seligen kinnder iren geleihen eribtail, so sy habent an dem guet, genant das Grueber guet ze obern Holczhaim in Swanser pharr, von seiner gesweiinn Anna, Hanns des Pudmer zee Chrotling tachter umb sechs phund phening, das ir veterleich erib ist, von uns und unserm gotshaus eribrecht. Also haben wir dem benanten Hannsen dem Vischer, seiner hawsfrawn Anna und iren baiden eriben die ogenanten gerechtigkait auf dem benanten guet mit aller seiner zuegehorung bestett und verlihen ze rechtem eribrecht in der beschaiden, das man uns und unserm gotshaus alle jar jerlich da von dienn und raihen sol nach inhaltung unsers urbar. Die egenant Anna und ir eriben verczeihen sich nw furbas, das sy nach ir eriben nach nyem von iren wegen furbas chain ansprach dar nach nimmer haben sullen noch wellen in chainerlay weis getrewlich angever. Auch ist ze merkchen, wann egenanten Ulreihen seligen kinnder, die zu iren vogtpern jarn kommen und iren geleihen eribteil losen wellen, des sol er in nichtt wider sein in cheiner weis umb die obgemelten summ gelts, darumb er es erlost hat und nicht hoher. Wir offen auch, das sy chain wandlung da mit haben schullen in chainerlay weis an unser handt und gueten willen und schulln auch alles das da von leiden und dulden, das ander unnsers gotshawss eribler gein uns leident und duldent unverczigen unsers gotshaws rechten in allen sachen. Des ze urkund geben wir in den brief, besigelten mit unserm anhangunden innsigel, der gegeben ist nach Christt gebuerde vierczehen hunndert jar und dar nach in dem drew und dreissigistten jare an sand Erharts tagee.