Wir Johanns von Gotes genaden abbt ze Lambach bechennen offenleich an dem brief, das n. fur uns chomen sind her Hanns Lambaher, gehorsamer sze Gleynkch, und sein swester Kathrey, Ullreichen des Ruttengastt hawsfraw, Hannsen des Dekcher seligen kinnder, und habent mit wolbedachtem muet und guetem willen mit unnser handt und gantzer bestet rechtt und redleich verchawfft ain wis mit aller irer czuegehorung, gelegen in unnserm purkchfrid ze Lambach sze nagst niden hin an an den Prenglein, Ulreichen dem Smid an dem Puhel, seiner hawsfraw Margrethen und iren baiden eriben umb ain summ gelts, des sy gants ausgerichtt und beczalt sind zu rechtten tegen und an allen schaden. Also haben wir in, den benanten Ullreichen dem Smid, seiner hawsfrawn Marigrethen und iren baiden eriben dew obgemelten wis mit aller irer czuegehorung, so von allter und durch recht darczue gehort oder davon bechomen mag, dar inn nichts ausgeczogen angever, bestett und verlihen sze rechttem purkchrecht in der beschaiden, das sy uns und unnserm gotshaus alle jar jarleich da von dienn und reichen sullen ze purkchrecht an dem brehentag sechs phening. Es sind auch die vorgemelten her Hanns und sein swester Kathrey und ir eriben der vorgenanten wis und aller szuegehorung des benanten Ullreihen seiner hawsfrawn und ir baider eriben in rechtter gewer und furstand fur all rechtleich ansprach, als offt in des mit recht, not und durft geschiecht, als dann solichs kawffs purkchrechts des gotshawss im landt ob der Ens recht ist. Wir offen auch, das sy chain wanndlung da mit haben in chainerlay weis an unser handt und gueten willen und sullen auch alles das da von lewden und dulden, daz ander unnsers goczhaws lewt gesessen in unserm purkchfrid ze Lambach leident und dulden unverczigen unnsers gotshawss rechten in allen sachen. Des ze urchund geben wir in den brief, besigelten mit unnserm anhangunden innsigel, der gegeben ist nach Kristt gebuerd vierczehen hunndertt jare und darnach in dem zway und dreyssigisten jare an dem nagsten sambcztag nach sand Urbanustage.