Universis presentes literas inspecturis. Oddo de Vareris apostolice sedis prothonotarius, ac domni nostri pape thesaurarius et reverendissimi in Christo patris domni Francisci miseratione divina archiepiscopi Narbonensis domni pape camerarii in camerariatus officio locumtenens, salutem in domino. Universitati vestre notum facimus per presentes, quod reverendus in Christo pater, domnus Martinus dei gratia episcopus Mothonensis de mandato nostro ex commissione domni nostri pape facta nobis oraculo vive vocis die dato presencium in capella sancti Andree sita intra basilicam principis apostolorum de urbe infra missarum solennia ordines celebrans generales, dilectum nobis in Christo Georgium Urdechen, Pathaviensis diocesis, scolari cupienti ascribi militie clericali, primam tonsuram, capillos sui capitis propriis manibus incidendo, contulit clericalem, et eundem expost incontinenti idoneum et sufficientem repertum, ad acolitatus ceterosque minores ordines promovit et duxit ordinandum iuxta formam et consuetudinem sancte Romane ecclesie in talibus observari consuetas. In quorum testimonium presentes literas fieri et sigilli camerariatus officii supradicti, quo utimur, fecimus appensione muniri. Datum Rome apud sanctos apostolos die sabbati quatuor temporum, quando cantatur in ecclesia Dei venite exultemus, videlicet die vigesimotertio mensis septembris anno Domini millesimoquadring entesimotricesimo, indictione octava, pontificatus sanctissimi in Christo patris et domni nostri domni Martini, divina providentia pape quinti anno tercio decimo.