Wir Johanns von Gotes genaden abbt ze Lambach und der gancz conventt des selben goczhawss bechennen offenleich mit dem brief, das wir wolbedechtleich mit verayntem rat und guetem willen rechtt und redleich verlihen haben unser hueb zu Sikkental mit aller irer czuegehorung gelegen in Offenhawser pharr und verleihen auch die wissentleich in chraft des gegenwurttigen briefs czu rechttem eribrecht Lienhart auf dem nydern Stainach, seiner hawsfrawn Anna und iren eriben mit alle den ern, rechten, nuczen, die von alltter und durch recht darczue gehornt oder da von bechomen mugen, nichts ausgenomen in solicher beschaidn, das sew uns und unnserm gotshaws alle jar jarleich da von dienn und rayhen sullen zw sande Michels tag newn meczen waicz, drey meczen gersten und czwainczigk meczen habern, als gewitert, und czw den weynachtten sybentzehen schilling und czwainczikch phening. Wir offen auch, sy sullen kain wandlung da mit haben an unser hannt und gueten willen in chainerlay weis, und sullen auch alles das da von leyden und dulden, das ander unnsers goczhauss eribler gein uns und unserm goczhaws leydn und dulden unveczigen unnsers goczhawss rechten in allen sachhn. Des zu urkund geben wir in den brief, besigelten mit unnser payden anhangunden innsigel, der geben ist nach Christt gepurd vierczehn hundert jar und dar nach in dem dreysskisttn jar an mantag nach sand Ypolltentag.