Wir Johanns von Gotes gnaden abbt zu Lambach und der gancz conventt des selben goczhawss bechennen offennleych mit dem brief, das wir ainn awswechsel getan haben mit unnserm prueder Jacoben dem Dachsperger und Kathreyn, seiner hawsfrawn, von wegen des guets im Reintal, daz da gelegn ist in unnser pharr zu Lambach, das sy von unserm goczhaws in eribrechts weis gehabt haben, des sy uns irr gerechtichayt dar auff ledichleych abgetretten sind, da wider wir in geben und in geanttwurtt haben in lehens weys unnser guet czu obern Chusstelwang pey dem Gatern mit allen czuegehorung gelegen [in] Widemspekcher pharr, und unnser wisen, genant dy Hoppfwis, mit irr czue gehorung, gelegn inn der Aw in eribrechts weys mit der beschayden, das man uns und unnserm goczhaws von den benantten wisen alle jar jarleich dyenn und geben sol in unnser oblay sechczikch phening und nicht mer, dar umb man Stepphan dem hirtten aynn jartag begen sol, allso anttwurttn wir in dem benanten unserm prueder dem Dachsperger, seiner hawsfrawn und all seinn eriben, daz benant guet und wisen mit aller czue gehorung ein aus unnser nucz und gewer in ir nucz und gewer mit alle dem, so dann von allter und durch recht darczue gehort und da von bechomen mag, nichts ausgenomen ungeferleych, das inne haben nuczn und nyessn und allen irn frumm wol da mit gehandeln und gschaffen mugen mit verseczn, verkauffn, gebn, schaffen oder machen wye sew verlust und wem sew wellen nach irr fuegsamchait. Wir seinn auch dez obgenanten guets und wisen des benantn Dachsperger, seiner hawsfrawn und seiner eribn ir rechtter gwer und fuerstand fuer all rechtlich ansprach, als offt in des mit recht, not und duerft geschiecht, alz dann solichs auswechsel und gwerschaft im landt ob der Enns recht ist, unverczigen unnsers goczhawss rechten als oben pegriffen ist. Des czw urchund gebn wir in den brief wesigeltn mitt unnsern payden anhangundn innsigeln, der geben ist nach Chrisst gepurd vierczehn hundert und dar nach in dem drewsskistn jar an mantag nach Oculi in der vasten.