Ich Jacob Dachsperger, mein hawsfraw und all unnser eriben bekennen offennleich mit dem brief, das wir ain awswechsel getan haben mit unnserm liebn herren und prueder heren Johannsen abt czu Lambach und dem ganczn conventt daselbs von wegen des guets czu Obern Chusstlwang pey dem Gatern mit alr czue gehorung gelegn in Widemspekcher pfarr und rechtslehen ist von dem erwirdigen goczhaus czu Lambach und von der wisen wegen, genant dye Hoppfwis mit aller czuegehorung gelegn inn der Aw, und ist eribrecht auch von dem egenantn goczhaws und von der benanten wisen man alle jar jarleich dienn und geben sol inn dy oblay sechczikch phennig und nicht mer von ayns jartags wegen, den man jarleich pegen sol Stepphan dem Hirtten. Da haben wir, ich obgenanter Dachsperger, mein hawsfraw dawider geben dem benanten meinem lieben heren und brueder und dem ganczn konventt unser erbrecht, so wir gehabt haben auf dem guet im Reyntal, daz da gelegn ist inn der pharr zu Lambach. Wir tuenn uns auch furbas des benanten guets im Reyntal gancz fuerczicht und verczeihen uns des ganczleych, daz wir noch unnser eribn noch nyem von unnsern wegen kainerlay ansprach nicht haben schullen noch wellen in chainerlay weys getrewleich angefer. Des czu urkund gib ich obgenanter Jacob der Dachsperger in den brief fur mich, mein hawsfraw und all unnser eriben besigelten mit meinem aygenn anhangunden innsigel, der geben ist nach Kristi gepuerd virczehnhundertt jar und darnach inn dem drewsskisten jar am mantag nach Oculi inn der vasten.