Wir Johanns von Gotes genaden abbt ze Lambach, bekennen, das fur uns komen ist Jorig Paldauf czu Wels und Ellspet sein swester, Hannsn dez Cholblens hawsfraw und habent wol bedachtlich rechtt und redleych irn hoff, genant der Pernawhof, gelegen niderhalb Wels ze nagst dem Chothof in Wellser pharr, und ist eribrecht von uns und unnserm goczhaws czw kawffen gebenn Anndre dem Wintter ze Wels, seiner hawsfraw Margret und irn payden eribn umb ain sum gelcz, des sy gancz beczalt sind. Aso haben wir den egenanten hof mit seiner czuegehorung dem benanten Andre, seiner hawsfrawn und erben aller bestatt und eingeantwurt mit alle den ern, rechten und nuczen, so dann von allter und durich recht darczue gehort oder davon bekome mag, nichts aws genomen ungeverlich inn der beschaidn, daz man uns und unnserm goczhaws alle jar jarlich da von dyenn und rayhen sol an unser frawn tag zder dienst czeyt sechczigk newer Wienner phenig. Es sind auch dy obgenanten Jorig und Ellspet und all ir eriben dez benanten hoffs mit aller seiner czue gehorung des benanten Anndre, seinr hawsfrawn und irr eriben rechtt gwern und fuerstand fuer all rechtleich ansprach, als offt in des mit recht, not und durft geschiecht, also dann solichs kauffs eribrechts und lancz ob der Enns recht ist. Wir offenn auch, das sy chain wanndlung damit habn in kayner lay weys an unser hant und guetn willn und alles das da von leyden und dulden daz ander unsers goczhauss eribler gein uns leydn und dulldn unverczign unnsers goczhauss rechten in alln sachhen. Des cze urkund gebn wir in [den] brief besigltn mit unserm anhangunden insigl, gebn ist nach Chrisst gepund vierczehenhundert jar und dar nach inn dem drewsskisstenn jar am phincztag inn der quottembmer inn der vassttenn.