Wir Hanns von Gotes genaden abbt ze Lambach bekennen mit dem brief, das fur uns komen ist Hanns der Viechtreuter anstat sein und seines brueder Symon und hat wolbedachtleich mit gutem willen seiner hausfrawen und ir aller erben und miterben mit ganczer stet recht und redleich verkauft das halb Aygen mit seiner zugehorung ze Riczling in Aczpekcher pharr gelegen und sein und seines benanten brueder und ander ir miterben rechts vaterleichs erib ist gewesen, und von unserm goczhaus eribrecht ist, und hat das verkauft ze rechtem kauff Elspeten der Smidin ze Riczling und allen iren erben umb ein gelt, des er sein brueder Symon von ir gar beczalt sind an schaden. Also haben wir der yecz benanten Elspeten und allen iren erben den kauf auf dem benanten halben Aygen und seiner zugehorung bestet und eingeantwurt mit allem dem, das von alter und durich recht darzu gehort, davon sy und ir erben mogen bekomen besucht und unbesucht, nichts ausgenomen in der beschaiden, das sy und ir eriben uns und unserm goczhaus alle jar davon dienen sullen nach inhalttung und lawt unsers goczhaws urbarpuchs. Es ist der benant Viechtreuter, sein brueder Symon mit sambt in all ir eriben und mit erben des benanten halben Aygen und seiner zugehorung der benanten Elspeten und irer erben aller ir recht gewern und furstandt an aller stat, also kaufs und des landes recht ist ob der Enns. Wir melden, das sy do mit dhain wandlung haben in dhainerlay weys an unser handt und guten willen und sullen auch alles das davon leiden, das ander unssers goczhaus eribler gen uns und unserm goczhaus leident und duldent unverczigen unsers goczhaus rechten in allen sachen. Mit urkund besteten wir den kauff versigelt mit unserm anhangundem insigel. Der brief ist geben nach Christes geburd vierzehenhundert jar, darnach in dem sechs und zwainczigsten jare des freytags vor dem palmtag.