Wir Hanns von Gots gnadn abbt ze Lambach bekennen mit dem offen brif, das fur uns komen ist Wolfgang, Wernharts des Maichefer sun, und hat mit wolbedachtem mut und gutem willen aller seiner erben ze der zeit, da er es an irrung wol getun mocht, recht und redleich verkawft ain sechstail, so er gehabt hat an der Perinn gut in der Prunnhub, gelegen ze Oberzeidlarn in Lambekcher pharr, und ist eribrecht von uns und unserm gotzhaws, und hat den ze kawffen geben Ullreichen dem Pern an der Leitten, Margreten seiner hawsfrawn und allen irn paiden erbn, dew sy miteinannder habent oder gewinnent, umb ain gelt, des sew gantz von in betzalt sind. Allso haben wir dem benanten Ullreichen, Margreten seiner hawsfrawn und ir paider erbn als oben be[schrib]en ist ze rechtem eribrecht verlihen mit allen den ern, rechten und nutzen, die davon bekomen mugen, nichts aus[gen]omen in der beschaiden, das man uns und unserm gotzhaws jarleich davon diennen und raichen sol nach innehaltung des eribbrifs, so uber das gantz gut ist. Der benant Wolfang Maicheffer und sein erbn sind auch des des egenanten sechstail an dem gut mit seiner zugehorung des egenanten Pern, seiner hawsfrawn und ir paider erbn, als oben verschriben ist, aller recht gewern und furstanndt fur alle ansprach, allso kawffs und des lanndes recht ist ob der Enns. Wir offen, sew sullen dhain wanndlung damit haben in dhainerlay weis an unser hanndt und guten willen, und sullen auch alles das davon leiden und dulden gein uns und unserm gotzhaus, das annder unsers gotzhaws erbler gein uns leident und duldent unvertzigen unsers gotzhaws rechten in allen sachen. Des ze urchund geben wir in den brif, versigelt mit unserm anhangunden insigel. Geben nach Christi geburd viertzehen hunndert jar darnach in dem vier und zwaintzigisten jar an sand Giligen tag.