Dem erwirdigen geistleichen herren hern Johannsen abt ze Lambach enpieten wir Anna, Jacobs von Nehaim seligen witib, und Margreth ir tachter, Albrechtz von Nehaim hawsfraw, unser willig dinst. Wyr lassen ewr gnad wissen von wegen des halben hofs ze Nehaim, den unser aidem und wirt verkauft hat, des Czoten chinder von Herling, der von ewrn gnaden und ewrn gotzhaws erb ist, den wir ewrn gnaden mit dem gegenwurtigen brief aufgeben mit der beschaiden, das ir denselben halben hof den benanten chindern gerucht ze verleichen, und pitten ewr gnad, ir wellet ir und das convent denselben chauff also bestetten, das wellen wir umb ewr gnad vleissichleich verdyenn. Ze urkund des briefs, besigelt mit der erbern Merteins des Praetwiser, diczeit ainer des ratz der stat ze Wels, und Otteins des Wechsler, purger daselbs aufgedrukchten insigl, dy sew durch unser vleissigen pet willen auf den brief gedrukcht habent, im und irn erben an schaden. Geben an phincztag vor Oculi anno etc. vicesimo quarto.