Ich Chunrat von Schiltdorf pharrer ze Gaspoczhofen bekenn an dem offen brief allen, den er furkumbt geistleichen oder weltleichen fuer mich und all mein nachkomen und auch fuer die gantz gemain der pharrlewt daselbs umb die geltschuld, so das erwirdig gotzhaws ze Lambach herren Hansen dem Tewrist saligen, weilent vicari ze Gaspatzhofen schuldig gewesen ist, und dieselb geltschuld der vorgenant her Hanns zu der benantten kirichen ze ainem ewigen jartag geschafft hat, derselben sum aller mich benanten herren Conraten der erwirdig geistleich herr, her Johanns, abbt und sein conventt ze Lambach gentzleich ausgericht und beczalet hat an allen abgang, und darumb sag ich benantter pharrer den egenanten abbt, sein convent und gotzhaws, der vorgenanten sum gelcz gantz yetz und hinfur fuer mich und all mein nachkomen und die gemain der frewntschaft und pharrlewt, dafuer ich mich wissentleich annym, quitt, ledig und los, und ob icht furbas brief herfuer kamen, die dew benanten sum berurtten von dem egenantten herren Hansen oder seiner frewntschaft, si waren geistleich oder weltleich, die schullen all ab, tod und verrichtew sein wider den gegenwurtigen brief in kainerlay weis angeverleich. Mit urkund des briefs besigelten mit der erbern herren Hannsen Haweysen, pharrer ze Swans, und Lienhart des Gorger, diezeit phleger ze Wolfseck, paider anhangunden insigel, die wir fleyzzig darumb gepeten haben, in und allen iren erben an scheden, wann ich vorgenantter Conrat diezeit aigen insigel nicht enhett, daruntter ich mich und mitsambt nur des egenantten herren Hansen des Tewrist gueter gedachtnuzz, frewntschaft und die gantz gemain der pharrlewt ze Gaspotzhofen verpinden alles das stett und unverkeret ze halden, das an dem brief begriffen ist, der geben ist nach Cristi geburd viertzehenhundert jar und darnach in dem zwayundzwaintzigisten jare des montag nach sand Mertteintag.