Ich Thoman Seidendrum burger ze Wels vergich fur mich und all mein erbn offenleich mit dem brif allen, den er furkumbt, das ich nach rat und weisung meiner nachsten und pesten frewnt zu der zeit, da ich es an irrung rechtleich wol getun mocht, recht und redleich gemacht und geben han meiner eleichen lieben hawsfrawn frawn Margreten, Seitzen des Tegelhoffer tochter sechtzig phunt Wienner phening ze rechter margengab nach dem lanndesrecht ob der Enns auf meinem halben hoff ze Oberhardleyten, gelegen in Ewerstalzeller pharr, und mein rechts erib ist von dem erwirdigen gotzhaus ze Lambach, dem man jarleich davon dint nach innehalten des eribbrifs, so daruber ist. Denselben halben hoff han ich der egenanten meiner lieben hawsfrawn eingeantwrt aus meiner nutz und gewer in ir nutz und gewer mit herren hanndt und gantzer stet mit allen den ern, rechten und nutzen, die von allter und durich recht darzu gehorent und davon bekomen mugen, nichts ausgenomen ungeverleich. Ich und mein erbn sein auch des egenanten halben hoffs mit seiner zugehorung der obgenanten meiner lieben hawsfrawn recht gewern und furstanndt fur alle ansprach, als offt ir des mit recht, not und durft geschicht, allso margengab und des lanndesrecht ist ob der Enns. Und was sy abgangs darinne hiet oder gewunn, das sol sy haben und bekomen auf allem andern meinem gut, wo das gelegen oder wie das genant ist, nichts ausgenomen. War aber, das ich mit dem tod vor meiner egenanten hawsfrawn abging, da Got lang vor sey, so mag sy ir vorgenantew margengab wol geben, schaffen, machen wem sey verlust, an mein und meiner erbn irung und hindernuzz, wir haben erbn miteinander oder nicht. Wir haben auch, ich und mein erbn, vollen gewalt den vorgenanten halben hoff herwider ze losen alle jar jarleich vor oder nach liechtmess in den nachsten viertzehen tagen umb die obgenanten sechtzig phunt Wienner pheuing oder was munzz die zeit gib und gab ist in dem lannd ob der Enns, damit sy dann hanndeln mag als oben begriffen ist. Des ze urchund gib ich benanter Seidendrum meiner egenanten hawsfrawn den offen brif, versigelt mit des erwirdigen geistleichen herren hern Hannsen abbt ze Lambach, des hoffs herr, anhangunden insigel, den ich und anstat aller meiner erbn darumb gebeten han, im und seinem gotzhaws in allen seinen rechten und vordrung jarleich und all weg unengolten und an schaden. Geben an sand Bartholomestag nach Christi geburd viertzehenhundert jar, darnach in dem zwayundzwaintzigisten.