Dem erwirdigen geistleichen meinem gnedign herren hern Jacoben abbt zw Lambach embeut ich Angnes, Hannsen dez Hawnolten seligen witib, burgerm ze Wels, mein willig gehorsam dinst zevor. Von des Sumpperhoffs wegen hie in Welser pharr gelegen, des mein prueder seliger Peter der Schueler von ewrn gnaden mein eriblehentrager gewesen ist, und wenn derselb mein prueder nu leider mit tod abgangen ist, dadurch, gnediger herr, pitt ich ewr gnad mit allem vleiss, ir wellet den benanten hoff in eriblehens weis zw mein hannden verleihen dem gegenburttigen meim frewnt Dietreichen dem Hawnolten und mir pei im schikchen, daz wil ich umb ewr gnad gern verdienn. Besigelt mit des erbern Ulreichen des Aicher, ainer des rats ze Wels insigl, den ich mit vleis darumb gepeten hab, im und sein eriben an schaden. Geben ze Wels am mantag nach Margarete anno etc. vicesimo.