Dem erwirdigen geistleichen herren hern abpt Jacoben ze Lambach enpeut ich Kathrey, Hainrich des Ritter hawsfraw und Hainrich tochter von Wufing vleissikchlich mein willigen gehorsamen dinst, und laz ewer genad wissen, lieber herr, daz wir daz gutel, da Michel aufsiczt, gelegen ze Wufing in Swanser pharr, daz haben wir verchawft und ze chawffen geben unser lieben muemen Barbara, Jorigens tochtter von Wufing, nwn pitten wir ewer genad, lieber herr, mit ganczem vleis, ir leicht daz obgenant guttel, daz wir von ewern genaden ze lehen gehabt haben, unser egenanten muemen und tut ir ganczew stat daruber, also ewers goczhaws recht ist, daz wellen wir umb ew genad gern verdienn. Mit urkund des offen brieffs versiglent mit des erbern mans Hansen des Pabenperger, verweser der Regawischen aygen, aufgedrukchten insigel, der daz tann hat durich unser vleizzig pet willen, ym und allen sein erben an schaden. Datum des freytags vor Oculi anno etc. decimo nono.