Dem erwirdigen geistleichen herren abpt Jacoben zw Lambach enpewt ich Hanns Sneyder purger ze Veklaprukg und ich Ulreichs und ich Margret und ich Anna und ich Dorothea und ich Elspet vleissigkleich unser willig gehorsam dienst, und lassen ewer genad wissen, lieber herr, daz wir unser mull genant am hochen rad gelegen in Gewalczchiricher pharr, dew wir von ewrn genaden ze eribrecht gehabt haben, dew haben wir halbe versaczt dem [e]rbern man Ulreichen dem Smid von Gewolczchirichen, seiner hawsfraw [un]d allen iren paiden erben umb an drey schilling zwelif phunt phennig [se]chs ganczew jar ungelost, wen dan die sechs jar nacheinander ausgent, so haben wir dan vollen gewalt all jar jarleich herwider ze losen zw unser frawntag zu der liechtmezz achttag vor oder in achttagen hinnach, umb die obverschriben phening und in jarfrist nicht mer. Nw pitten wir obverschribenew geswisttret ewer wirdichait mit ganczem vleis, lieber herr, ir leicht dew vorgenant mull dem obgenanten Ulreichen dem Smid und tut ym ganczew stat daruber, alz ewrs goczhaws recht ist, daz wellen wir umb ewer genad gern verdienn, und waz wir dan von dem brief und von dem insigel geben sullen, daz ste an ewrn genaden, lieber herr, und daz sol der ambtman sagen pey seinem gewissen. Daz dem also sey und daz sol zu dem saczz geschriben werden in dem brief, des sentten wir ewrn genaden den offen brief, verpetschaft mit meins lieben sweher aufgedrukchten petschaft Ulreichs dez Gruebers, des rates ainer ze Veklaprukg, der daz dan hat durich unser vleissiger pet willen ym und allen [seinen] erben an schaden. Geben ze Pruk dez phincztags in der ersten vastwochen in der chottemer anno etc. decimonono.