Wir Jans von Gots gnaden abpt ze Lambach verjechen offenbar mit dem gegenbu^ertigen prief, daz fu^er uns cho^emen ist vraw Elsbeth von Wielting und hat mit wolbedachtem mu^et di zeit da si ez wol getu^en mochtt mit herren hant und mit aller sta^et auf dem aygen datz Wielting auf einem aygen div dreu tail gemachtt, und auf ainem eryb daselbn datz Wieltinge diu dreu tail gelegen in Gerboltzchircher pharre gemacht und gegeben irem wiert Gotschalchen und allen iren baydn erben mit allen den rechten und nutzen diu durch recht darzu^e geho^erend mit solicher beschaidenhait, daz man unserm gotzhaus jarlich davon dyenen sol von dem aygen dreu viertail habern, und ain huen an sand Michels tag und nicht mer. Und von dem eryb dreizzig wienner pienning ze unser vrowen tag ze der dyenstzeit und vierdhalben wienner pfenning ze voitstewr an sand Georgen tag, und nicht mer. Wer aber daz yemand herfu^er chom der pezzer eryb wold sein zu dem vorgenandn aygen und auch eryb, derselb sol geben dem egenandn Gotschalchen und seiner hausvrow Elsbethen oder ir bayden eryben ainz un zwaintzig pfunt wienner pfenning an alln chrieg au unser vrowen tag ze der lyechtmesse vor acht tag oder hinnach acht tag. Daz bestetig wir in mit dem offenen prief versigeltn mit unserm anhangundem insigel. Datum anno domini millesimo trecentesimo sexagesimo quinto in die gloriosissime virginis et martiris Do^erotheae.

Source Fulltext: OÖUB 8 (Wien 1883) S. 206f., Nr. 203