Ich Jo^erig von Volkchenstorff und ich Agnes sein howsfrow^e und alle unser erben wir verjehen offenleich an dem brief und tu^en chunt allen lo^ewten den der brief fu^erchu^emt oder gezaigt wirt, daz wir mit wolbedachtem mu^et recht und redleich zder zeit do wir daz mit recht und mit aller unser willen unversprochenleich wol getu^en mo^echten haben ze chauffen gegeben dem erwirdigen und geistleiehem herren abt Hainreichen und dem convent und dem gotshaws ze Chremsmu^enster unser wysen di da gelegen ist pey des gotshaws hof ze Vischen in Chembnater pharr, und genant die Achleiterinn, di wir auch emalen von demselben gotshaws zelehen gehabt haben, und di vorgenanden unser wysen der sechs tagwerch wismats sint haben wir in ze chauffen gegeben auz unserr nutz und gewer in ir und ires gotshaws nůtz und gewer mit allen den eren rechten und nůtzen di von allter durch recht darzu^e gehorent, besucht und unbesucht wie die genant sint, umb fu^emf und sechtzikch phunt alter wyenner phenning, der wir von in und von irem gotshaws gantz und gar gericht und gewert sein, also mit beschaidner red, ob daz waer daz ymant mit briefen herfu^er nach uns chaem, ez waeren christen oder juden die hintz dem gotshaws ze Chremsmu^enster von der vorgenanden sechs tagwerch wismats und von der wisen wegen ichtes zesprechen hieten von unsern wegen, die selben brief alle sullen gaentzleich und gar ab sein und to^ed wider den gegenburtigen brief, also daz wir vorgenant noch ander nyemant von unsern wegen hintz den egenanden sechs tagwerch wismats noch hintz der wysen furbaz nymmer mer nichts zesprechen haben, weder mit recht noch an recht wenikch noch vil. Wir sein auch des obgenanden sechs tagwerch mismats der wisen und des chauffs ir und ires gotshaws gewern ze hof ze tayding wo in des no^et und durft geschicht und also wir daz zerecht tu^en sullen nach lants recht, und waz in und dem gotshaws an der gewerschaft von uns abget des sew mit recht schaden naemen, den selben schaden sullen wir in gantz und gar ablegen und widercheren, und sullen sew daz haben datz uns vorgenanden datz unsern trewn und auch auf aller unsrer hab wo wir di haben in des hertzogen lant von Osterreich si sey besucht oder unbesucht, und sullen ires schadens davon bechomen so sew peste mugen wir sein lembtig oder to^ed. Daz in und dem gotshaws die red und der chauff also stet unverchert beleib, daruber so gib ich in vorgenander Jo^erig von Volchenstorf fu^er mich und mein erben den offenn brief besigelt mit meinen anhangundem insigel. Und ze ainer pezzern staetichait der sachh besigelt und bevestt mit meines lieben pruder hern Ortolfs von Volchenstorff anhangundem insigel im an schaden, und sint des chaufs und der taiding gezeug Ernst der Otzstorffer zden zeiten richter ze Chremsmunster und Wernhart der Gaetringer und anderr erber lo^ewt genueg. Der brif ist geben ze Weizzenberch do man zalt von Christi gepurde drewtzehen hundert jar und darnach in dem zwayund sechtzigistem jar an sand Thomas tag.

Source Fulltext: OÖUB 8 (Wien 1883) S. 115ff., Nr. 111