Ich Nicla und ich Seyfrid und ich Fridreich die Lantzenperger wir drey pru^eder und all unser erben veriehen offleich an disem brief und tun chunt allen den, di in sehent oder ho^ernt lesen, daz wir mit wolbedachtem mu^et und mit unsrer pesten vreunt rat und zu der zeit do wirs wol getu^en mo^echten, recht und redleich zu chaufen haben geben den erbern herren der samnung zu Chremsmünster in di oblay di Pfaffen Hlueb halbeu, die unser vreys aygen ist, die auch gelegen ist in sand Marein chiricher pfarr, mit allen den rechten und nu^etzen, die dar zu geho^ernt zu holz zu veld zu wismad versucht und unversucht wie di genant sint, aus unser nu^etz und gewer in di irren umb vierzehen phunt wiener pfenning, der seu uns ganz und gar gericht und gewert habent. Wir sein auch der vorgenanten halben hu^eb ir scherm und gewer nach landes recht an aller der stat, da in des not und durft geschicht. Wer aber daz getan, daz y^emmant nach uns herfu^er chaem, der pezzer erb wolt sein zu der vorgenanten halben hueb, der schol den obgenanten herrn der samnung zu Chremsmu^enster geben vier und zwainzik phunt wienner phenning und schol seinen frum da mit schaffen in allem dem recht als vor geschriben stet. Daz den erbern herren diseu sach von uns hin fu^er stet und unverchert beleib, dar u^eber so geben wir in disen offen brief versigelten mit meinem Niclas des Lantzenberger anhangunden insigel und ich Seyfrid und ich Fridreich sein pru^eder verpinten uns mit unsern treun hinder unsers pruders Niclas des Lantzenberger insigel alle die gelu^eb stet zebehalten, die oben geschriben stent, wann wir selber aygner insigel nicht enhaben, und zu einer pezzern statichait versigelten mit unserr lieben geswein Wernhartes des Gaetringer und Petreins von Mauttern anhangunden insigeln, die der sach taydinger gewesen sint in an allen schaden. Der brief ist gegeben nach Christi gepu^erd dreuzehen hundert iar und dar nach in dem fu^emf und funfzigisten iar an dem heiligen auffert tag.

Source Fulltext: OÖUB 7 (Wien 1876) S. 413f., Nr. 402